खरे आणि खोटे संदेष्टे कसे ओळखावे? | बायबलनुसार चमत्कार आणि भविष्यवाणी

पवित्र शास्त्रात आपण पाहतो की देवाचा सेवक मोशे व अहरोन यांनी देवाच्या सामर्थ्याने चिन्हे व चमत्कार केले. त्याचप्रमाणे मिसरच्या जादुगारांनीही काही चिन्हांसारखी कृत्ये केली. परंतु शेवटी अहरोनाच्या काठीने त्यांच्या काठ्या गिळून टाकल्या.

निर्गम ७:१०-११ — “मग मोशे व अहरोन ह्यांनी फारोजवळ जाऊन परमेश्वराच्या आज्ञेप्रमाणे केले; अहरोनाने आपली काठी फारो व त्याचे सेवक ह्यांच्यापुढे टाकली तेव्हा तिचा साप झाला. मग फारोनेही जाणते व मांत्रिक बोलावले; मिसराच्या त्या जादुगारांनीसुद्धा आपल्या मंत्रतंत्रांच्या योगे तसाच प्रकार केला. त्यांनीही आपापल्या काठ्या खाली टाकताच त्यांचे साप झाले; पण अहरोनाच्या काठीने त्यांच्या काठ्या गिळून टाकल्या.”

२ थेस्सलनीकाकर २:९ — “ज्यांचा नाश होत चालला आहे त्यांनी आपले तारण साधावे म्हणून सत्याची आवड धरायची ती धरली नाही; त्यामुळे त्यांच्यासाठी सैतानाच्या कृतीप्रमाणे सर्व प्रकारची खोटी महत्कृत्ये, चिन्हे, अद्भुते आणि सर्व प्रकारचे अनीतिजनक कपट ह्यांनी युक्त असे त्या अनीतिमानाचे येणे होईल.”

यावरून आपल्याला समजते की सर्वच चिन्हे व चमत्कार देवाकडून आहेत असे मानता येत नाही. तसेच सर्वच संदेष्टे देवाकडून आहेत असेही मानता येत नाही.

म्हणून झालेला चमत्कार किंवा चिन्ह कोणापासून आहे, हे ओळखण्यासाठी आपण पवित्र शास्त्राच्या आधारावर काही लक्षणांचा अभ्यास करूया.

१. त्या चमत्काराद्वारे देवाचे गौरव होते का?

पहिली गोष्ट म्हणजे एखाद्या चिन्हाने किंवा चमत्काराने कोणाचे गौरव होत आहे हे तपासा. गौरव उपदेशकाचा, उपदेशाचा, मिनिस्ट्रीचा किंवा चर्चचा नसून येशू ख्रिस्ताकडे निर्देश करणारा असला पाहिजे.

योहान १६:१४ — येशू म्हणाला की पवित्र आत्मा त्याचे गौरव करील.

पवित्र आत्म्याचे कार्य येशू ख्रिस्ताकडे निर्देश करणे आणि त्याचे गौरव करणे आहे. म्हणून कोणतेही आध्यात्मिक कार्य, चिन्ह किंवा चमत्कार येशू ख्रिस्ताचे गौरव करीत आहे का, हे तपासणे आवश्यक आहे.

२. चिन्हे आणि चमत्कार देवाच्या स्वभावाशी सुसंगत आहेत का?

देव नीतिमान, सत्यवान आणि न्यायी आहे. म्हणून एखादी अद्भुत गोष्ट किंवा चमत्कार देवाच्या स्वभावाशी आणि त्याच्या वचनाशी विसंगत असेल, तर त्याची पारख करणे आवश्यक आहे.

माझा येशू नीतिमान आहे. माझा येशू न्यायाने परिपूर्ण आहे. माझा येशू सत्याने भरलेला आहे. म्हणून आपल्याला खऱ्या येशूची ओळख असणे आवश्यक आहे. अन्यथा मनुष्य फसवला जाऊ शकतो.

म्हणून आलेली भविष्यवाणी, प्रकटीकरण किंवा संदेश देवाच्या वचनाशी जुळतो का, याची पडताळणी करा. अभ्यासू आणि देवभीरू सेवकांशी सल्लामसलत करा, जेणेकरून आपण सुरक्षित राहू आणि फसवणूक टाळू शकू.

आपण सर्व भाऊ-बहिणी आहोत. आपण एक कुटुंब आहोत. म्हणून “मला सर्व काही माहीत आहे”, “मला सर्व कळते” अशा वृत्तीने स्वतःला इतरांपेक्षा अधिक आध्यात्मिक समजू नका.

हे बायबलआधारित आहे का? हे तपासूया.

बिरीया येथील लोकांनी शास्त्रातून पडताळणी केली

प्रेषितांची कृत्ये १७:११ — “तेथील लोक थेस्सलनीकातल्या लोकांपेक्षा मोठ्या मनाचे होते; त्यांनी मोठ्या उत्सुकतेने वचनाचा स्वीकार केला, आणि ह्या गोष्टी अशाच आहेत की काय ह्याविषयी ते शास्त्रात दररोज शोध करत गेले.”

म्हणून कोणतीही शिकवण, भविष्यवाणी किंवा संदेश ऐकला की तो शास्त्राशी सुसंगत आहे का, हे तपासणे आवश्यक आहे.

३. त्या चिन्हाचा किंवा संदेशाचा उगम तपासा

एखाद्या चिन्हाचा, भविष्यवाणीचा किंवा आध्यात्मिक संदेशाचा उगम कोठून आहे, हे तपासणे आवश्यक आहे. त्याचा उगम देवाकडून आणि पवित्र आत्म्याच्या कार्याशी सुसंगत आहे का, हे पवित्र शास्त्राच्या प्रकाशात तपासा.

४. चिन्हे आणि भविष्यवाणी आत्मिक उन्नतीकडे नेत आहेत का?

देवाकडून असलेल्या चिन्हे, चमत्कार किंवा भविष्यवाणीचा परिणाम मनुष्याला देवाकडे वळवणारा, पश्चात्तापाकडे नेणारा आणि आत्मिक उन्नतीस मदत करणारा असायला हवा.

त्यातून शांतीचा अनुभव होऊ शकतो, बंधनातून मुक्तता मिळू शकते, बोध होऊ शकतो आणि आत्मिक बळ मिळू शकते. केवळ तात्पुरते समाधान किंवा उत्साह निर्माण होणे पुरेसे नाही.

उदाहरण: निनवेचा पश्चात्ताप

योना ३:१-१० मध्ये निनवेच्या लोकांनी योनेचा संदेश ऐकून पश्चात्ताप केला आणि आपल्या कुमार्गापासून वळले.

“देवाने त्यांचे वर्तन पाहिले म्हणजे अर्थात ते आपल्या कुमार्गापासून वळले आहेत हे पाहिले; तेव्हा ‘त्यांच्यावर अरिष्ट आणीन’ असे जे तो म्हणाला होता त्याविषयी तो अनुताप पावला आणि त्याने त्यांच्यावर ते आणले नाही.”

एखादी व्यक्ती आश्चर्यकर्म करते आणि लोकांची प्रतिक्रिया “वा! वा!” अशी होते, परंतु त्यातून जीवनात परिवर्तन, पश्चात्ताप किंवा आध्यात्मिक वाढ होत नसेल, तर त्या गोष्टीची गंभीरपणे पारख करणे आवश्यक आहे.

“देव मला दाखवत आहे” या दाव्यांची पडताळणी

आजकाल पुष्कळ दावे ऐकण्यास मिळतात—“देव मला दाखवत आहे की देव तुम्हाला एक नवीन कार देत आहे”, “देव तुम्हाला परदेशात घर देणार आहे” इत्यादी.

अशा भविष्यवाणीमुळे मनुष्याच्या आतल्या जीवनाला आत्मिक फायदा होत आहे का? त्याचा स्वभाव बदलत आहे का? तो देवाकडे अधिक वळत आहे का? याचा विचार केला पाहिजे.

“देव मला दाखवत आहे” हा प्रकार केवळ सेवकांमध्येच नाही तर मंडळीमध्येही पाहायला मिळतो. देव नक्कीच मार्गदर्शन करू शकतो; परंतु ते मार्गदर्शन बायबलच्या सत्याशी सुसंगत आहे का आणि त्याची योग्य प्रकारे पडताळणी करता येते का, हे पाहणे आवश्यक आहे.

उदाहरण १: योसेफाला येशूच्या जन्माबद्दल मिळालेले मार्गदर्शन

मत्तय १:१९-२० मध्ये योसेफ मरीयेला गुप्तपणे सोडण्याचा विचार करत असताना प्रभूच्या दूताने स्वप्नात दर्शन देऊन त्याला मार्गदर्शन केले.

“योसेफा, दाविदाच्या पुत्रा, तू मरीयेचा आपली पत्नी म्हणून स्वीकार करण्यास अनमान करू नकोस, कारण तिच्या पोटी जो गर्भ आहे तो पवित्र आत्म्यापासून आहे.”

उदाहरण २: पेत्र व कर्नेल्य

प्रेषितांची कृत्ये १०:१-२३ मध्ये कर्नेल्याला देवाकडून मार्गदर्शन मिळाले आणि पेत्रालाही दृष्टान्त व पवित्र आत्म्याच्या मार्गदर्शनाद्वारे पुढील गोष्टी समजल्या.

पेत्र त्या दृष्टान्ताविषयी विचार करत असता आत्मा त्याला म्हणाला, “पाहा, तीन माणसे तुझा शोध करत आहेत. तर ऊठ, खाली ये आणि काही संशय न धरता त्यांच्याबरोबर जा; कारण मीच त्यांना पाठवले आहे.”

भविष्यवाणीचा उपयोग कशासाठी होत आहे?

आपण मोठमोठ्या प्रार्थनासभांमध्ये काही संदेष्टे एखाद्या व्यक्तीला केंद्रित करून बराच वेळ त्या व्यक्तीबद्दल भविष्यवाणी करताना पाहतो. संपूर्ण मंडळी जल्लोष करते. कधीकधी जन्मतारीख, गावाचे नाव, बहिणीचे नाव, भावाचे नाव, गाडीचा नंबर, बँक खाते क्रमांक अशा वैयक्तिक गोष्टी सांगितल्या जातात.

अशा प्रकारची भविष्यवाणी बराच वेळ चालते आणि बाकीची मंडळी केवळ पाहत बसते. यातून मनुष्याच्या जीवनात सुधारणा होत आहे का? तारणाचा संदेश मिळत आहे का? पश्चात्ताप आणि आत्मिक वाढ होत आहे का? याची पारख करणे आवश्यक आहे.

५. चमत्कार आणि भविष्यवाणी देवाचे भय निर्माण करतात का?

प्रेषितांची कृत्ये ५:११-१४ मधील हनन्या व सप्पीरा यांच्या घटनेनंतर मंडळीवर मोठे भय आले. या घटनेत देवाच्या पवित्रतेचे आणि न्यायाचे गांभीर्य दिसून येते.

हनन्या आणि सप्पीरा यांनी खोटे बोलले आणि त्यांना देवाकडून शासन झाले. त्या घटनेनंतर मंडळीमध्ये देवाचे भय निर्माण झाले.

आज आपण स्वतःला हा प्रश्न विचारला पाहिजे: आपल्या प्रार्थनासभा, भविष्यवाणी आणि आध्यात्मिक कार्यांमुळे लोकांमध्ये देवाचे भय, पश्चात्ताप आणि पवित्र जीवनाची इच्छा निर्माण होते का?

आजकाल अशा प्रकारच्या प्रार्थनासभाही पाहण्यास मिळतात जिथे मुख्य वक्ता गर्दीला विचारतो, “काय मी भविष्यवाणी करावी का? काय खरेच मी भविष्यवाणी करावी का?” आणि लोक म्हणतात, “हो, आम्हास भविष्यवाणी पाहिजे!”

कोणाचेही अनुकरण करू नका; बायबलचे अनुकरण करा, बायबलचे.

देवाचे भय असले पाहिजे. भविष्यवाणी ही केवळ गंमत किंवा मनोरंजनाचा विषय होऊ नये. सुरुवातीच्या दिवसांत जेव्हा कोणीतरी भविष्यवाणी करत असे, तेव्हा लोक पश्चात्तापी अंतःकरणाने रडताना दिसत. मी मनात प्रार्थना करत असे, “देवा, माझे हृदय, माझे पाप या उपदेशकास प्रकट करू नको.”

परंतु आज काही ठिकाणी पाप उघड होण्याऐवजी फक्त बँक खाते, फोन नंबर किंवा परदेशात जाण्याबद्दलच्या गोष्टी उघड केल्या जातात. लोकांना खोटी दृष्टान्ते सांगितली जातात.

एकदा एका सेवकाने मला फोन करून सांगितले की, “देवाने मला दाखवले आहे की तुमच्या परिवारात अपघात होणार आहे.” मी घाबरून न जाता प्रार्थना केली, “प्रभू, जोपर्यंत तू मलाही वैयक्तिकरीत्या सांगत नाहीस, तोपर्यंत मी विश्वास करणार नाही.” देवाने मला असे काही दाखवले नाही आणि त्या सेवकाने सांगितल्याप्रमाणे काही घडलेही नाही.

म्हणून कोणतीही भविष्यवाणी ऐकून लगेच विश्वास ठेवण्याऐवजी तिची पवित्र शास्त्राच्या आधारावर पडताळणी करणे आवश्यक आहे.

६. शास्त्रातून त्यास दुजोरा मिळतोय का ते तपासा

प्रियानो, ते शास्त्रानुसार आहे का? प्रत्येक भविष्यवाणी, प्रत्येक दृष्टान्त देवाच्या वचनाशी सुसंगत आहे का? याची पडताळणी करा.

कधीकधी आमच्या पाळकाने स्वीकारले आहे म्हणून आम्ही देखील स्वीकारतो. एखाद्या मंडळीने मान्य केले म्हणून आम्ही देखील मान्य करतो. हे योग्य नाही.

पाळक किंवा मंडळीने एखादी गोष्ट मान्य केली आहे म्हणून ती आपोआप सत्य ठरत नाही. आपण पवित्र आत्म्याचे ऐकले पाहिजे आणि त्याचबरोबर जे काही सांगितले जाते ते देवाच्या वचनाशी सुसंगत आहे का, हे तपासले पाहिजे.

प्रेषितांची कृत्ये १७:११ मधील बिरीया येथील लोकांप्रमाणे आपणही शास्त्रात शोध करून सत्याची पडताळणी केली पाहिजे.

७. खरा आणि खोटा संदेष्टा कसा ओळखावा?

मत्तय १२:३३ — “झाड चांगले आणि त्याचे फळ चांगले असे म्हणा; अथवा झाड वाईट आणि त्याचे फळ वाईट असे म्हणा; कारण फळावरून झाड कळते.”

झाडाची ओळख त्याच्या फळांमुळे होते. म्हणून एखाद्या संदेष्ट्याचे किंवा सेवकाचे मूल्यांकन केवळ त्याच्या कृपादानावरून करू नका; त्याच्या फळांवरून, चरित्रावरून आणि जीवनाच्या साक्षीवरूनही पारख करा.

मत्तय ७:२० — “ह्यास्तव तुम्ही त्यांच्या फळांवरून त्यांना ओळखाल.”

त्या व्यक्तीचे देवावर प्रेम आहे का? त्याची साक्ष कशी आहे? त्याची वृत्ती कशी आहे? तो नम्र आहे का? त्याचे जीवन पवित्रतेकडे नेत आहे का? याची पारख करा.

एखादी व्यक्ती संदेश देत आहे, लोकांना विश्वासात आणत आहे किंवा तिच्याकडून चमत्कार घडत आहेत, याचा अर्थ ती व्यक्ती नक्कीच सत्याची व्यक्ती आहे, असा निष्कर्ष काढता येत नाही.

मत्तय ७:२२-२३ मधील गंभीर इशारा

मत्तय ७:२२-२३ — “त्या दिवशी पुष्कळ जण मला म्हणतील, ‘प्रभो, प्रभो, आम्ही तुझ्या नावाने संदेश दिला, तुझ्या नावाने भुते घालवली व तुझ्या नावाने पुष्कळ महत्कृत्ये केली नाहीत काय?’

“तेव्हा मी त्यांना स्पष्ट सांगेन की, ‘मला तुमची कधीच ओळख नव्हती; अहो अनाचार करणार्‍यांनो, माझ्यापुढून निघून जा.’”

म्हणून सावध राहा. तुम्हाला प्रभावित करणारा संदेष्टा किंवा उपदेशक पवित्र जीवन जगत आहे का? तो देवभीरू आहे का? तो नम्र आहे का? त्याच्या जीवनाचे फळ काय आहे? याची पारख करा.

खोट्या सेवकांपासून सावध राहा

अनेक स्वतःला उपदेशक म्हणवणारे प्रसिद्धीच्या मागे आहेत. स्वतःला पवित्र भासवणारे काही उपदेशक व्यभिचारात जीवन जगत आहेत. स्वतःला फार हुशार समजणारे स्वार्थी सेवक दान-दशांशच्या नावाखाली मंडळीला लुटत आहेत.

२ करिंथकर ११:१३ — “कारण अशी माणसे म्हणजे खोटे प्रेषित, कपटी कामदार, ख्रिस्ताच्या प्रेषितांचे सोंग घेणारी अशी आहेत.”

मागील दोन वर्षांपूर्वी एका पाळकाने मला एका आठवड्यात सवलतीच्या दरामध्ये बायबल उपलब्ध करून देतो असे सांगून मोठी रक्कम माझ्याकडून घेतली. आजपर्यंत “आज देतो”, “पुढील आठवड्यात देतो” अशी हजारो खोटी आश्वासने केली.

अशा अनुभवांमुळे कोणत्याही सेवकावर लगेच विश्वास ठेवण्याऐवजी त्याचे जीवन, वर्तन, प्रामाणिकपणा आणि त्याची शिकवण यांची पारख करणे आवश्यक आहे.

सैतानाच्या फसवणुकीपासून सावध राहा

१ पेत्र ५:८ आपल्याला सावध राहण्याची सूचना देतो. आपला शत्रू सैतान गर्जणार्‍या सिंहासारखा कोणाला गिळावे हे शोधत फिरतो.

म्हणून आध्यात्मिक बाबतीत निष्काळजी राहू नका. प्रत्येक गोष्ट तपासा आणि बायबलच्या सत्याशी सुसंगत आहे का ते पाहा.

चिन्हे आणि चमत्कारांपेक्षा येशूला अधिक जाणून घ्या

सर्व परिस्थितीत पौलाप्रमाणे आपला एक उद्देश असावा—“मला येशूला जाणून घ्यायचे आहे.” चिन्हे आणि चमत्कार नव्हे, तर “मला येशूला अधिकाधिक जाणून घ्यायचे आहे” हाच ध्यास असावा.

पौल दमास्कसला जात असताना येशूला भेटला. त्याने अद्भुत प्रकाश पाहिला आणि येशूचा आवाज ऐकला. त्या अनुभवानंतरही त्याची इच्छा येशूला अधिक जाणून घेण्याचीच होती.

पौल म्हणतो की इतर सर्व गोष्टी तो नुकसान समजतो, जेणेकरून तो येशू ख्रिस्ताला ओळखू शकेल. हीच आपली उत्कट इच्छा असावी.

मला येशूला जाणून घ्यायचे आहे. येशूला ओळखण्याची वेळ आली आहे. जर आपण येशूला ओळखले तर आपण त्याच्यामध्ये बळकट होऊ आणि फसवणुकीपासून सावध राहू शकू.

आज मंडळी फसली जात आहे. बऱ्याच उपदेशकांना आज देवाचे ज्ञान नाही; ते येशूला ओळखत नाहीत. म्हणून आज चिन्हे-चमत्कारांच्या मागे धावण्यापेक्षा येशूला अधिक जाणून घेण्याची इच्छा आपल्या मनात निर्माण होण्याची गरज आहे.

केवळ दृष्टान्त आणि स्वप्नांसाठी नव्हे, तर दररोज बायबलमधील प्रत्येक पानातून, देवाच्या वचनातून येशूचे ज्ञान अधिकाधिक मिळण्याची इच्छा असली पाहिजे. आणि ते ज्ञान आपल्या जीवनाचा भाग बनले पाहिजे.

येशूचे जीवन आपली आत्मिक भूक भागवते.

निष्कर्ष: चमत्कारांपेक्षा येशूला जाणून घेणे महत्त्वाचे

चिन्हे आणि चमत्कारांच्या मागे धावण्यापेक्षा आपण येशू ख्रिस्ताच्या ज्ञानात आणि त्याच्याबरोबरच्या नात्यात वाढले पाहिजे.

आपल्या जीवनात चिन्हे आणि चमत्कार असले तरी त्याबरोबर नम्रता, पवित्रता आणि देवाचे भय असले पाहिजे. आपली प्रार्थना अशी असावी:

“चिन्हे आणि चमत्कार नव्हे, परंतु प्रभू, मला तुला अधिक जाणून घ्यायचे आहे.”

आरोग्य मिळो अथवा न मिळो, आपल्याला तारण ख्रिस्तामध्ये मिळाले पाहिजे. कारण तारण हे आपल्या जीवनातील सर्वात मौल्यवान देवाचे कार्य आहे.

जर आपण या शिक्षणाद्वारे आशीर्वादित झाला असाल तर जरूर आपल्या प्रियजनांना शेअर करा.

खोट्या संदेष्ट्यांबद्दल अधिक ऐका

या व्हिडीओतून देखील खोट्या संदेष्ट्यांबद्दल अधिक इशारा ऐकण्यास मिळेल.

What the Bible says about Day of the Dead | मृतदिन बद्दल पवित्र शास्त्र काय सांगते? — या लेखातून देखील चुकीच्या शिक्षणाबद्दल वाचता येईल.