स्थानिक मंडळी म्हणजे काय? | Local Church

आज पुष्कळ लोक इमारतीलाच मंडळी किंवा चर्च म्हणतात. परंतु खरे तर विश्वासणाऱ्यांनाच चर्च म्हणजेच मंडळी असे म्हटले आहे. मंडळी हा शब्द ग्रीक भाषेतील एक्लिसिया (Ekklesia) या शब्दापासून आला आहे. त्याचा अर्थ “बोलाविलेले लोक” असा होतो.

“चर्च” हा शब्द केवळ इमारतीशी संबंधित नसून लोकांशी संबंधित आहे. परंतु जेव्हा लोक विचारतात, “तुम्ही कोणत्या मंडळीत किंवा चर्चमध्ये आराधनेसाठी जाता?” तेव्हा अनेकदा ते एका इमारतीचा संदर्भ घेतात.

रोम १६:५ मध्ये म्हटले आहे, “...जी मंडळी त्यांच्या घरी आहे, तिलाही सलाम.” पौल त्याच्या घरी एकत्र येणाऱ्या मंडळीबद्दल बोलत आहे. तो मंडळीच्या इमारतीच्या संदर्भात बोलत नाही, तर विश्वासणाऱ्यांविषयी बोलत आहे.

स्थानिक मंडळी म्हणजे काय?

स्थानिक मंडळी म्हणजे विश्वासणाऱ्यांचा एक गट. हे विश्वासणारे देवाची भक्ती करण्यासाठी, त्याचे वचन ऐकण्यासाठी, प्रार्थना करण्यासाठी आणि मंडळीच्या कार्यात सहभागी होण्यासाठी एकत्र जमतात.

ख्रिस्ती लोकांनी या रीतीने एकत्र यावे, असे नव्या करारातील शिक्षण आहे.

मंडळीमध्ये एकत्र येणे

इब्री १०:२५ — “आपण कित्येकांच्या चालीप्रमाणे आपले एकत्र मिळणे सोडू नये.”

प्रेषितांच्या काळात विश्वासणारे देवाची उपासना करण्यासाठी एकत्र जमत असत. आरंभी ते नियमितपणे एकत्र जमत असत आणि नव्या करारात आठवड्याच्या पहिल्या दिवशी विश्वासणारे एकत्र येत असल्याचेही दिसते.

प्रभू येशू ख्रिस्त आठवड्याच्या पहिल्या दिवशी मेलेल्यांतून उठला. म्हणून ख्रिस्ती विश्वासणाऱ्यांसाठी एकत्र येणे, देवाची उपासना करणे आणि प्रार्थना करणे महत्त्वाचे आहे.

बहुतेक मंडळ्यांमध्ये रविवारी उपासना सभा भरते. तसेच देवाच्या सेवाकार्यासाठी मंडळीमध्ये अर्पण दिले जाते.

१ करिंथ १६:२ — “आठवड्याच्या पहिल्या दिवशी तुम्ही प्रत्येकाने जसे आपणांस यश मिळाले असेल तसे...”

मंडळीला अर्पण देणे

जुन्या कराराच्या काळात नियमशास्त्राप्रमाणे दशांश देणे आवश्यक होते. नव्या करारात देण्याबाबत विश्वासणाऱ्याने आपल्या अंतःकरणाने आणि देवाने दिलेल्या आशीर्वादाच्या प्रमाणात देण्यावर भर दिला आहे.

आपण देवाला काय आणि किती द्यावे हे विचारपूर्वक व प्रार्थनापूर्वक ठरवावे आणि आनंदाने व उदार मनाने द्यावे.

२ करिंथ ९:७ — “प्रत्येकाने आपआपल्या मनात ठरविल्याप्रमाणे द्यावे. दुःखी मनाने किंवा देणे भाग पडते म्हणून देऊ नये; कारण संतोषाने देणारा देवाला प्रिय असतो.”

उपासनेला उपस्थित राहणे, नियमितपणे अर्पण देणे, मंडळीच्या कार्यात भाग घेणे, मंडळीसाठी प्रार्थना करणे आणि देवाला शोभेल असे जीवन जगणे ही प्रत्येक विश्वासणाऱ्याची जबाबदारी आहे.

मंडळीचे विधी व संस्कार

मंडळीचे दोन प्रमुख विधी आहेत:

1. बाप्तिस्मा
2. प्रभुभोजन

या दोन विधींसंबंधी प्रभू येशू ख्रिस्ताने आज्ञा दिल्या आहेत.

१. बाप्तिस्मा

बाप्तिस्मा म्हणजे “नवीन जन्म” किंवा “पापाची क्षमा” नव्हे. अंतरंगातील वास्तविक परिवर्तनाचे बाप्तिस्मा हे बाह्य प्रतीक आहे.

पुढील शिक्षण वाचण्यासाठी येथे क्लिक करा — 👉 बाप्तिस्मा

२. प्रभुभोजन

प्रभुभोजन हा ख्रिस्ताने लावून दिलेल्या विधींपैकी एक विधी आहे.

मत्तय २६:२६–२९ मध्ये प्रभू येशूने आपल्या शिष्यांबरोबर प्रभुभोजन पाळल्याचे वर्णन आहे.

पुढील शिक्षण वाचण्यासाठी येथे क्लिक करा — 👉 प्रभुभोजन कोणी घ्यावे?

कृपासाधने

बाप्तिस्मा व प्रभुभोजन यांच्या द्वारे विश्वासणाऱ्याला देवाचा आशीर्वाद प्राप्त होतो. ज्यांच्याद्वारे देवाचे आशीर्वाद मिळतात त्या गोष्टींना कृपासाधने असे म्हटले जाते. देवाचे आशीर्वाद नेहमी विश्वासाने स्वीकारले जातात.

१. प्रार्थना

अडचणीच्या वेळेस देवाचा धावा करणे म्हणजे प्रार्थना अशी अनेकांची कल्पना आहे. परंतु ख्रिस्ती जीवनात प्रार्थना हे फार महत्त्वाचे कृपासाधन आहे. प्रार्थनेच्या द्वारे देवाची सखोल ओळख होते.

इफिसकरांस ६:१८ — “सर्व प्रकारची प्रार्थना व विनंती करा, सर्व प्रसंगी आत्म्याच्या प्रेरणेने प्रार्थना करा आणि ह्या कामी पूर्ण तत्परतेने व सर्व पवित्र जनांसाठी विनंती करीत जागृत राहा.”

कलस्सै ४:२ — “प्रार्थनेत तत्पर असा व तिच्यात उपकारस्तुती करीत जागृत राहा.”

१ थेस्सल ५:१७ — “निरंतर प्रार्थना करा.”

मंडळी एकत्र येऊन प्रार्थना करते तेव्हा विश्वासणारे एकमेकांसाठी प्रार्थना करतात आणि देवावर आपला विश्वास व्यक्त करतात.

२. पवित्र शास्त्राचे वाचन

देव आपल्या वचनाद्वारे विश्वासणाऱ्याला स्वतःची ओळख करून देतो. तो शिकवतो, मार्गदर्शन करतो व आशीर्वाद देतो. एवढेच नव्हे, तर पवित्र आत्मा विश्वासणाऱ्याला देवाचे वचन समजावून सांगतो.

देवाच्या वचनाद्वारे पापांची जाणीव, पश्चात्ताप, विश्वास व पवित्रीकरण यांना महत्त्व प्राप्त होते.

२ तीमथ्य ४:१३ — “वाचन, बोध व शिक्षण याकडे लक्ष ठेव.”

३. उपदेश ऐकणे

प्रत्येक विश्वासणाऱ्याला पवित्र शास्त्राच्या वाचनाने देवाचे सत्य ग्रहण करता येते. तथापि, संदेश ऐकल्याने न समजणाऱ्या किंवा कठीण गोष्टींचा उलगडा होण्यास मदत होते.

१ तीमथ्य ४:६ — “ह्या गोष्टी बंधुवर्गापुढे मांडल्या तर विश्वासाच्या वचनांनी व सुशिक्षणाला तू अनुसरलास त्याच्या वचनांनी पोषण करून घेणारा असा तू ख्रिस्त येशूचा चांगला सेवक होशील.”

४. उपासना करणे

उपासना करण्याचा अर्थ सर्वश्रेष्ठ व्यक्तीचा आदर करणे किंवा तिचा सन्मान करणे असा होतो. माणसाने देवाची उपासना केली पाहिजे.

उपासना कशी करावी किंवा उपासनेचे आशीर्वाद याविषयी जाणून घेण्यासाठी येथे क्लिक करा.

व्हिडिओ पाहण्यासाठी येथे क्लिक करा 👇

स्थानिक मंडळी आणि सार्वत्रिक मंडळी

सार्वत्रिक मंडळी म्हणजे सर्व जगातील आणि सर्व काळातील विश्वासणारे. या विषयाविषयी सविस्तर शिक्षणासाठी खालील स्वतंत्र लेख वाचा.

👉 सार्वत्रिक मंडळी किंवा चर्च म्हणजे काय?

निष्कर्ष

स्थानिक मंडळी म्हणजे केवळ एक इमारत नाही, तर देवावर विश्वास ठेवणाऱ्या विश्वासणाऱ्यांचा एकत्रित समुदाय आहे. विश्वासणारे देवाची उपासना करण्यासाठी, त्याचे वचन ऐकण्यासाठी, प्रार्थना करण्यासाठी, एकमेकांना प्रोत्साहन देण्यासाठी आणि देवाच्या सेवाकार्यात सहभागी होण्यासाठी एकत्र येतात.