मेरी स्लेसर यांची जीवनकथा | Mary Slessor Biography

आफ्रिकेची गोरी राणी

मेरी स्लेसर १८४८–१९१५

मेरी स्लेसर यांचे बालपण | Mary Slessor Childhood

पाऊस पडत होता. एक सोळा वर्षाची तरुणी पथदिव्यांच्या प्रकाशात चालत होती. गुंडांची टोळी तिचा पाठलाग करत होती. त्यांनी तिला घेरा घालेपर्यंत तिला त्याबद्दल काहीच माहीत नव्हते. त्या टोळीचा नायक गोळा बांधलेला साखळदोर गरगर फिरवीत तो त्या मुलीजवळ आणला आणि म्हणाला, “आम्ही तुला असा धडा शिकवू की, तू संडे-स्कूल विसरून जाशील, तेंव्हाच आम्ही शांत राहू.”

ती सडपातळ मेरी धीटाईने म्हणाली, “तुम्हाला जे आवडते ते तुम्ही करू शकता.” आणि तशीच उभी राहिली. गरगर फिरणारा गोळा बांधलेला साखळदोर तिच्याजवळ जवळजवळ येत होता. परंतु मेरी न डगमगता धैर्याने उभी राहिली. ती झोपडपट्टी भागातील मुलांसाठी बायबलचे वर्ग घेत होती. ते वर्ग बंद करण्याच्या निश्चयाने हे सर्व दंगेखोर या मुलीबरोबर अशाप्रकारे गैरवर्तन करीत होते.

धैर्याने उभ्या असलेल्या मेरीला पाहून त्यांचा द्वेष कौतुक आणि नवलाईमध्ये बदलला. ती संपूर्ण टोळी तिच्या सभेमध्ये जाऊन बसली. तोच त्या दंगेखोरांच्या नायकाच्या जीवनातील कलाटणीचा प्रसंग होता.

तरुण मेरीचे प्रारंभीचे जीवन | Mary Slessor Early Life

मेरी स्लेसरचा जन्म स्कॉटलंडमध्ये २ डिसेंबर १८४८ मध्ये झाला. तिचे आई-वडील फार गरीब होते. जेव्हा मेरी ११ वर्षांची होती, तेव्हापासून आई-वडिलांना मदत करण्यासाठी ती एका कारखान्यामध्ये सकाळी ६ पासून सायंकाळी ६ पर्यंत काम करीत असे. त्यानंतर ती रात्रीच्या शाळेमध्ये शिक्षण घेण्यासाठी जात असे. ती कारखान्यात काम करत असतानाही तिचे बायबल वेळ मिळेल त्याप्रमाणे वाचत असे. प्रभू तिच्या फार जवळ होता आणि तो नेहमी तिच्याबरोबर बोलत असे. योहानाचे शुभवर्तमान हे तिचे आवडीचे पुस्तक होते. मेरी नेहमी रात्री बायबल वाचन करीत असताना झोपायचे विसरून जाई.

मेरीचे वडील दारूडे होते आणि सतत ते तिच्या आईला मारत असत. तिचे जीवन फारच खडतर होते. ते कधी कधी मेरीला बाहेर काढून देत. ती रस्त्यावर फिरे आणि अंधारात रडत असे. परंतु या सर्व त्रासांनी तिला भविष्यातील जीवनासाठी बळकट केले होते.

मेरीची आई चांगली ख्रिस्ती होती. ती लेकरांना तिच्याभोवती जमा करीत असे आणि येशूबद्दल त्यांना सांगत असे. काही मुलांनी येशूबद्दल एकदाही ऐकले नव्हते. मेरीला मिशनबद्दलची इच्छा तिच्या आईपासून मिळाली होती. त्या दिवसांत मेरी तिच्या आईला सांगे, “मम्मी, मला मिशनरी व्हायचे आहे आणि त्या काळ्या मुलामुलींना शिकवायचे आहे.”

खेळ खेळतेवेळी ते संदेशाप्रमाणे खेळत असत. मेरी काल्पनिक काळ्या मुलांना सुवार्ता सांगत. त्या मुलांना आफ्रिकेबद्दल खूप चांगली माहिती होती. त्यांचा भाऊ रॉबर्ट मिशनरी म्हणून आफ्रिकेला जाण्यास उत्सुक होता. त्यांच्या आईला देखील वाटले होते की, रॉबर्ट आफ्रिकेला मिशनरी म्हणून जाईल. परंतु थोड्याच दिवसांत, मेरी १४ वर्षांची असतानाच तिचे वडील आणि दोन भाऊ, त्यांच्यापैकी एक रॉबर्ट, वारले होते. तेव्हा कुटुंबाची सर्व जबाबदारी मेरीवर आली. म्हणून मेरीला नेहमीच स्वतःचा त्याग करून कुटुंबासाठी जगावे लागे. परंतु या सर्व त्रासांमध्ये मेरी पहिल्यापेक्षा अधिक सहनशील आणि धीट झाली.

आफ्रिकेला बोलावणे | Mary Slessor Called to Africa

मेरी आफ्रिकेला मिशनरी म्हणून जाण्यापूर्वी तिने स्वतःच्या शहरात ख्रिस्ताची सेवा संपूर्ण हृदयाने केली. जर आम्ही आमच्या घरात व समाजात विश्वासू असलो तरच आम्ही इतर ठिकाणी देखील साक्षी होऊ शकतो. मेरी कारखान्यामध्ये १० तास कष्ट करीत असे आणि त्यानंतर जितकी तिला सेवा करता येईल तितकी ती ख्रिस्तासाठी करीत राहत होती. तिने अशाप्रकारे १४ वर्षे सेवा केली. परंतु अजूनही आफ्रिकन जंगल आणि झोपड्यांबद्दलचा दृष्टांत तिच्या डोळ्यांसमोर नेहमी असे.

एक दिवस डेव्हिड लिव्हिंगस्टन हा आफ्रिकेतील मिशनरी मरण पावल्याची वाईट बातमी स्कॉटलंडला पोहोचली. आता प्रश्न उभा राहिला की, “कोण ती जागा घेईल?” या आव्हानाने मेरीच्या विचारांना आफ्रिकेला जाण्यासाठी मजबुती दिली. मेरीने याबद्दल आपल्या आईला सांगितले. तिच्या आईने परवानगी दिल्यावर मेरीने ताबडतोब मिशन बोर्डाला लिहिले. लगेच मिशन बोर्डाने तिला होकार कळवला की, आफ्रिकेतील कालबारमध्ये मिशनरी म्हणून तिचा स्वीकार करण्यात आला आहे.

सन १८७६ मध्ये एके सकाळी, स्टीम जहाजाच्या वरच्या मजल्यावर उभे राहून मेरी स्लेसरने तिच्या मित्रांची रजा घेतली. त्या जहाजामधील अमेरिकेला जाणारे व्हिस्कीचे ड्रम पाहून ती म्हणाली, “इतके गॅलन व्हिस्की, परंतु फक्त मिशनरी एकच.” ती निराश झाली होती. जहाजामधील मित्राने आफ्रिकेमधील सर्व माहिती दिली. त्याने घनदाट अरण्याबद्दल सांगितले, डोंगरातून वेगाने वाहणाऱ्या नद्या, जे गोऱ्यांनी कदाचित पाहिले नसावे, एकाएकी येणारे प्रचंड तुफान वादळ व त्यामुळे झोपड्या उडून जाणे आणि झाडे मुळासकट उखडून जाणे. त्याने पाणघोडे, मगरी, हत्ती, बिबटे आणि सर्प यांच्या बाबतीतही वर्णन केले होते.

मेरी आफ्रिकेमध्ये | Mary Slessor in Africa

त्या ड्यूक टाउनच्या बंदरात जाऊन पोहोचल्या. येथे मेरीने ४ वर्षे लोकांमध्ये सेवा केली आणि त्यांची भाषा शिकली व अधिक त्या लोकांबद्दल अभ्यास केला. लवकरच तिने स्वतःला त्या लोकांमध्ये सामावून घेतले. परंतु तिच्या हृदयातील इच्छा आफ्रिकेतील आतील भागात जाण्याची होती, जेथे कोणासही ख्रिस्ताबद्दल माहिती नव्हती.

अंधारखंड आणि आफ्रिकेतील परिस्थिती

फारच लवकर मेरीला हे समजले की, आफ्रिकेला अंधारखंड का म्हटले जायचे. तेथे पाप होते, विश्वासघात होता, घाण, गुलामगिरी सर्वत्र पाहायला मिळे. माणसे, स्त्रिया आणि मुले पकडली जायची आणि त्यांना निष्ठुरपणे गुलाम म्हणून विकले जाई. त्यांना जनावरांपेक्षा फार वाईट वागणूक देत. जे लोक तेथे राहत ते फार दुष्टपणे एकमेकांशी लढाई करीत. नेहमीच ते दुष्ट आत्म्याच्या भीतीमध्ये जीवन जगत. त्यांना वाटे की, ते आत्मे सर्व झाडांत, नदी किंवा तळ्यांमध्ये राहतात. लोक त्यांचा वेळ दारू पिण्यामध्ये, नाच करण्यामध्ये घालवत व एक वंश दुसऱ्या वंशाबरोबर भांडत असे. त्यांच्या वंशापैकी एक वंश हा नरभक्षक म्हणून ओळखला जायचा. दैवतांना खूष ठेवण्यासाठी ते प्राण्यांचे रक्त सांडीत असत.

जर एखादा आफ्रिकेतील पुढारी मेला, तर इतर प्रमुख लोक त्याची बायको आणि मुले यांना कापून सोबतीकरीता त्याच्याबरोबर पुरत असत. कोणी हा गुन्हा केलेला आहे हे शोधून काढण्यासाठी संशयितांना पकडले जाई. त्यांना विष प्यायला दिले जाई किंवा त्यांचे हात उकळत्या तेलामध्ये ठेवायला सांगितले जाई. जर जुळे जन्मले तर त्यांना मारून टाकीत. ते असा विचार करीत की, ते सैतानाने पाठविले आहे किंवा त्यांना भुकेल्या चित्त्यासमोर पुढे टाकले जाई आणि आईला जंगलात एकटे सोडले जाई. या लोकांनी कधीही येशूबद्दल किंवा येशूच्या प्रेमाबद्दल ऐकलेले नव्हते. त्यांना हे देखील माहित नव्हते की, येशू त्यांना त्यांच्या पापांतून मोकळे करून त्यांचे जीवन शुद्ध आणि आनंदी बनवू शकतो.

“माँ स्लेसर” | Mary Slessor and Twins

एके दिवशी मेरीने ऐकले की, एका आफ्रिकन बाईला जुळे मुले झाली आहेत. मेरी तिच्या झोपडीकडे गेली. तेथे असलेल्या आजीबाईंना तिने विचारले, “तुम्ही ह्या बाळांचं काय करणार आहात?” ती म्हणाली की, ते त्यांच्या पाठी मोडतील आणि त्यांना झुडपांमध्ये फेकून देतील. मग मेरीने तिला विनंती करून ती बाळे मागून घेतली आणि तिने ती घरी नेली व वाढविली. परंतु एका नातलगाने येऊन एका बाळाला चोरून नेले आणि त्याने ते मारून टाकले. परंतु मेरीने मुलगी बाळाला दत्तक घेतले. तिचे संगोपन व संरक्षण केले.

मेरी त्याच लोकांप्रमाणे गवती छपरात राहत असे आणि मासे खात असे. मासे, याम आणि केळी जसे ते लोक खात तसे ती देखील अन्न खात असे. ती त्या लोकांसाठी एक शिक्षिका म्हणून काम करीत होती. ती त्यांच्यासाठी कपडे शिवून देई, आजाऱ्यांची सेवा करून, त्यांच्यातील भांडणे-झगडे सोडवीत असे. तिने आईप्रमाणे माया दाखवल्यामुळे लोक तिला “माँ” म्हणत. ती “माँ स्लेसर” नावाने प्रसिद्ध झाली.

आतील प्रदेशातील सेवा | Mary Slessor Missionary Work

मेरीला आतील प्रदेशात जावयाचे होते जो फार घनदाट झाडाझुडपांनी भरलेला होता. तेथील लोक फार निष्ठूर होते. ते समुद्रकिनारी बसणाऱ्या लोकांचे शत्रू होते. जरी मिशनने तिला तिकडे जाण्यास मनाई केली होती, तरी एके रात्री ३ आफ्रिकन मुले, एक आफ्रिकन मुलगी आणि एक बाळ या सर्वांसोबत तिने जंगलातून प्रवास करावयास सुरुवात केली.

जेव्हा ते एका खेड्यात पोहोचले त्यांनी त्यांच्यासाठी एक घर उभे केले. बांबूच्या झोपडीत मातीची भांडी होती. झोपडीमध्ये पुरेशी जागा नसल्यामुळे त्यांनी ती भांडी बाहेर टांगली होती. त्यांनी चर्च बांधायला सुरुवात केली. मेरीने त्या खेड्यातील लोकांना काही कपडे दिले. तिने त्यांना स्वयंपाक करावयाचे व कपडे शिवण्याचे शिक्षण दिले. तिने लेकरांना वाचायला व लिहायला शिकविले आणि येशूबद्दलसुद्धा सांगितले.

“गोरी राणी” | Mary Slessor

मेरीने अनेक मैल चालून जाऊन त्यांच्यामध्ये असलेली अनेक भांडणे मिटविली. एक दिवस तिने ऐकले की, लवकरच एक युद्ध सुरू होणार आहे. मग एकटीच ती अंधारातील जंगलात चालत गेली आणि देवाला प्रार्थना केली की, देवाने तिला जंगली पशूंपासून सुरक्षित ठेवावे.

तिला हे धैर्य कसे मिळाले? ती जन्मताच धैर्यवान होती काय? नाही. स्कॉटलंडमध्ये जर एखादी गाय शेतात चरत असेल तर तिला त्या मार्गाने जाण्याची भीती वाटत असे. तिच्यामध्ये वास करणारा पवित्र आत्मा तिला धैर्य देत होता. फार लवकरच तिला नीतिमान न्यायाधीश म्हणून स्वीकारण्यात आले होते. म्हणून तेथील नेतेमंडळी तिच्याकडे नेहमी येऊन तिचा सल्ला घेत असत. एक समयी एक झगडा मिटवावयास पूर्ण दिवस खर्च करावा लागत असे. तिचा सल्ला नेहमी स्वीकारला जात असे. कारण ती नेहमीच खरी होती आणि लोकांना माहीत होते की, ती कधीच चुकीचे करीत नाही.

जेव्हा ब्रिटिश सरकारने तो प्रांत घेतला तेव्हा त्यांनी मेरीला त्यांची प्रतिनिधी म्हणून नेमले होते. तिला “गोरी राणी” म्हणत असत.

आफ्रिकन लोकांप्रमाणेच ती खूप साधे जीवन जगत असे. जो तुटपुंजा पगार तिला मिळत होता, त्यातून ती बचत करून आपल्या आईला व बहिणीला पाठवित असे. एक वाईट बातमी मिळाली की, त्या दोघी मायलेकी एका वर्षातच एकीनंतर एक मरण पावल्या होत्या. मेरीला असे वाटले की, तिला सर्वांनी सोडून दिले आहे. परंतु तिला तिच्या आफ्रिकन कुटुंबामध्ये आता पुष्कळ मुले होती. ती जुळी किंवा गुलाम किंवा अनाथ होती ज्यांना तिने सोडवून आणून त्यांचे संरक्षण केले होते. मेरी तिच्या कार्यात इतकी मग्न होती की, तिला आठवड्याचे वार देखील ध्यानात राहत नव्हते. तिच्या कार्यामध्ये तिच्या मित्रांच्या प्रार्थनेने तिला मदत केली होती.

आफ्रिकेसाठी इच्छा | Mary Slessor's Love for Africa

तिच्या आजारपणामुळे तिला स्कॉटलंडला नेण्यात आले होते. ती बरी झाल्याबरोबर ताबडतोब तिला आफ्रिकेला पाठवावे असे तिला वाटायचे किंवा असे म्हटले जायचे की, ती पोहत-पोहत आफ्रिकेला जाईल. कारण तिला, ख्रिस्ताविना पुष्कळ लोक मरत आहेत असे वाटे.

जेव्हा ती आफ्रिकेला परतली तेव्हा ती त्या नरमांसभक्षक लोकांमध्ये व गुलामांचा व्यापार करणाऱ्या लोकांमध्ये बिनधास्त गेली. जरी ती वयोवृद्ध होत होती, तरी ती तिचे काम चपळाईने करीत असे. ती खेडेगावांत सायकलवरून प्रवास करीत असे. कधी-कधी लोक तिला खर्चीट बसायला लावीत आणि उचलून नेत असत.

ब्रिटीश सरकारने त्या भागातील न्यायाधीश म्हणून तिच्या कार्याची प्रशंसा केली. मेरी स्लेसर ही ब्रिटीश राजवटीतील पहिली महिला न्यायाधिकारी होती. सुरुवातीला तिच्या कार्याची माहिती कोणालाही नव्हती. परंतु लवकरच तिचे कार्य बाहेरच्या जगापुढे प्रकट करण्यात आले. ब्रिटिश राजाने तिला “चांदीचा क्रूस” तिच्या चांगल्या कार्याचे पारितोषिक म्हणून दिला. जे देवाचा सन्मान करतात, अशाप्रकारे देव त्यांचा सन्मान करतो.

गौरवामध्ये विश्रांती | Mary Slessor Death

मेरी स्लेसर पुन्हा तिच्या मातृभूमीला गेली नाही. तिच्या शेवटच्या श्वासापर्यंत तिला आफ्रिकेमध्येच सेवा करण्याची इच्छा होती. ती आजारपण व म्हातारपणापुढे कधीच झुकली नाही. जरी ती आजारी पडली आणि तिला हालचाल करता आली नाही, तरी ती बिछाण्यात पडल्या-पडल्या प्रार्थना करीत असे. तिचे विचार स्वर्गाकडे वळाले.

शेवटी १३ जानेवारी १९१५ रोजी ती तिच्या महान राजाच्या समक्षतेत तिच्या विश्वासू व प्रामाणिक कार्याचा आशीर्वाद घेण्यासाठी गेली. तिचे बायबल तिच्या बिछाण्यात तिच्या बाजूलाच होते. तिच्या सर्व धडपडीत तेच साक्षीदार होते. त्या बायबलमध्ये सर्वत्र संदर्भ आणि टिप्पण्या लिहिलेल्या होत्या. तिची संपत्ती म्हणजे काही जुने कपडे, थोडी पुस्तके आणि ढीगभर पत्रे मागे सोडली. जरी ती एक गरीब जीवन जगली होती, तरी तिने खरोखर पुष्कळांना धनवान केले.

एक सडपातळ आणि भित्री स्कॉटलंडची स्त्री एक उपयोगी व परिपूर्ण जीवन जगली आणि आशीर्वाद मिळविण्यासाठी दूर निघून गेली. कारण तिने तिच्या सर्व मार्गात देवाचे आज्ञापालन केले होते.

तुमचे जीवनसुद्धा आशीर्वादित होईल, जर तुम्ही वाईट जीवन सोडून येशूचे अनुकरण कराल.

आपणाकरिता विचार

एका गरीब कुटुंबात जन्म घेऊन, मेरी स्लेसर तिच्या बालपणापासून ख्रिस्ताच्या प्रेमात वाढली. तिच्या घरातील बिकट परिस्थितीमुळे तिने कारखान्यात काम केले आणि रात्री शाळेत जाऊन अभ्यास केला. अशा परिस्थितीत असताना तिच्या आईने तिच्या लेकरांना येशूच्या प्रेमाबद्दल आणि काळ्या आफ्रिकन मुलांबद्दल, ज्यांनी येशूबद्दल कधीच ऐकले नाही, आपल्या भोवती बोलावून शिकविले होते.

नंतर मेरी स्लेसरने निर्णय घेतला, “मी मिशनरी म्हणून आफ्रिकन मुलामुलींमध्ये जाईन आणि त्यांना शिकवीन.” ती तिच्या निर्णयात पक्की होती. प्रभू तिला तेथे घेऊन गेला. तिने आपले संपूर्ण जीवन त्या अंधारखंडात घालविले आणि पुष्कळ लोकांना ख्रिस्ताकडे वळविले.

प्रिय तरुणांनो, तुम्ही ख्रिस्ताकरिता तुमचे जीवन कसे खर्च करीत आहात? मेरी स्लेसर स्त्री असताना प्रभूसाठी महान गोष्टी करू शकली.

आपल्या देशातील खेड्यांमध्ये पुष्कळ लोकांना ख्रिस्ताबद्दल काहीच माहीत नाही. तुम्ही त्यांच्यासाठी काय करणार आहात? तिच्या फार कठीण सेवेमध्ये सुद्धा तिने आपल्या कुटुंबावर प्रेम केले. तिला जो तुटपुंजा पगार मिळत होता, त्यापैकी काही भाग तिने आपल्या कुटुंबासाठी घालविला.

प्रिय तरुणांनो, तुम्ही कोणत्याही उच्चपदावर विराजमान झालेले असाल, तरी तुम्ही तुमच्या आई-वडिलांना विसरता कामा नये. तुम्ही त्यांचा सन्मान करावा. एवढेच केवळ नाही, तुम्ही देवाची सेवा तुमच्या मंडळीमध्ये केली पाहिजे. जेव्हा आम्ही हे करू, तेव्हा देवबाप आम्हाला उंच करील.

🙏 Please Share and be blessed 🙏