खरा पश्चात्ताप म्हणजे काय? | बायबलनुसार पश्चात्ताप आणि पापांची क्षमा

पश्चात्ताप म्हणजे पापापासून पूर्णपणे परावृत्त होणे आणि चुकीच्या मार्गावरून मागे वळून देवाच्या इच्छेप्रमाणे जीवन जगणे. पश्चात्ताप म्हणजे पापाचा त्याग करणे आणि पवित्र जीवन जगण्यासाठी पवित्र आत्म्याच्या साहाय्याचा स्वीकार करणे.

१. तारणासाठी पश्चात्ताप आवश्यक आहे

सर्वजण देवासमोर दोषी आहेत. म्हणून तारणासाठी पश्चात्ताप आवश्यक आहे. पश्चात्ताप करण्याचे महत्त्व प्रभू येशू ख्रिस्ताने आपल्या संदेशातून स्पष्ट केले.

मार्क १:१५ — “पश्चात्ताप करा.” हा प्रभू येशू ख्रिस्ताच्या संदेशातील महत्त्वाचा भाग होता.

लूक १३:३ — पश्चात्ताप न केल्यास नाश होईल, असे येशू ख्रिस्ताने सांगितले.

देव सर्व लोकांना पश्चात्ताप करण्याची आज्ञा करतो.

प्रेषितांची कृत्ये १७:३० — देव आता सर्वत्र सर्व माणसांना पश्चात्ताप करण्याची आज्ञा करतो.

लूक २४:४७ — ख्रिस्ताच्या नावाने पश्चात्ताप व पापक्षमा यांची घोषणा सर्व राष्ट्रांमध्ये करण्यात यावी.

२ पेत्र ३:९ — कोणाचा नाश व्हावा अशी देवाची इच्छा नाही, तर सर्वांनी पश्चात्ताप करावा अशी त्याची इच्छा आहे.

या जगात जीवन असताना मनुष्याला पश्चात्ताप करण्याची संधी आहे. त्यामुळे या संधीकडे दुर्लक्ष न करता देवाकडे वळणे महत्त्वाचे आहे.

२. खरा पश्चात्ताप म्हणजे केवळ दुःख नव्हे

पश्चात्ताप म्हणजे पापाविषयी दुःख वाटणे, असा अनेकांचा समज असतो. दुःख वाटणे आणि रडणे हा पश्चात्तापाचा एक भाग असू शकतो; परंतु केवळ दुःख व्यक्त करणे म्हणजे खरा पश्चात्ताप नव्हे.

उदाहरणार्थ, मला पुण्याला जायचे आहे; पण मी चुकून छत्रपती संभाजीनगरला जाणाऱ्या एस.टी. बसमध्ये बसलो, तर मला पुण्याला पोहोचता येणार नाही. चुकीच्या बसमध्ये बसल्याचे मला दुःख झाले, तरी मी बस बदलली नाही, तर त्या दुःखाचा काही उपयोग होणार नाही.

त्याचप्रमाणे, पापाबद्दल केवळ दुःख करून किंवा पाप कबूल करून भागत नाही. पाप करणे थांबविले पाहिजे, पापापासून मागे वळले पाहिजे आणि देवाच्या इच्छेप्रमाणे वागले पाहिजे.

जेव्हा एखाद्या व्यक्तीला खरा पश्चात्ताप होतो, तेव्हा तिच्या विचारांत आणि वागण्यात बदल घडतो. एखादी व्यक्ती पश्चात्ताप झाल्याचे सांगते; परंतु तिच्या जीवनात कोणताही बदल घडत नसेल, तर तिच्या पश्चात्तापाच्या प्रामाणिकपणाचा विचार करणे आवश्यक आहे.

३. जक्कयाचे उदाहरण: खऱ्या पश्चात्तापाचे फळ

जक्कयाला आपल्या पापांची जाणीव झाली. त्याने मनापासून पश्चात्ताप केला आणि आपली चूक मान्य केली.

त्याने प्रभू येशूला म्हटले, “प्रभूजी, पाहा, मी आपले अर्धे द्रव्य दरिद्र्यांस देतो; आणि मी अन्यायाने कोणाचे काही घेतले असेल, तर ते चौपट परत करतो.”

यावर येशूने त्याला म्हटले, “आज ह्या घराला तारण प्राप्त झाले आहे, कारण हाही अब्राहामाचा पुत्र आहे.”

या उदाहरणातून दिसून येते की खरा पश्चात्ताप केवळ शब्दांत नसतो, तर तो कृतीतूनही व्यक्त होतो.

प्रेषितांची कृत्ये २६:१८ — लोकांनी अंधारातून प्रकाशाकडे आणि सैतानाच्या अधिकारातून देवाकडे वळावे.

४. पश्चात्ताप कृतीतून व्यक्त होतो

पश्चात्तापाची खरी ओळख व्यक्तीच्या जीवनातील बदलावरून होते.

लूक ३:८ — “पश्चात्तापास योग्य अशी फळे द्या.” असे बाप्तिस्मा करणाऱ्या योहानाने सांगितले.

पापापासून मागे वळणे आणि योग्य कृती करणे हे पश्चात्तापाचे महत्त्वाचे लक्षण आहे.

५. पश्चात्ताप हे देवाचे दान आहे

पश्चात्ताप करण्याची संधी आणि सामर्थ्य देवाच्या कृपेमुळे मिळते.

प्रेषितांची कृत्ये ११:१८ — देवाने परराष्ट्रीयांनाही जीवन मिळावे म्हणून पश्चात्तापबुद्धी दिली आहे.

६. खऱ्या पश्चात्तापाचे परिणाम

६.१ स्वर्गात आनंद होतो

लूक १५:१० — पश्चात्ताप करणाऱ्या एका पापी माणसाबद्दल देवाच्या दूतांसमोर आनंद होतो.

६.२ पापांची क्षमा मिळते

प्रेषितांची कृत्ये ३:१९ — “यास्तव तुमची पापे पुसून टाकली जावी म्हणून पश्चात्ताप करा व मागे वळा.”

तारणासाठी पश्चात्ताप करणे महत्त्वाचे आहे. तसेच, ख्रिस्ती जीवन जगताना झालेल्या पापांबद्दलही आपण देवाजवळ कबुली देऊन त्याच्याकडे क्षमा मागितली पाहिजे.

७. बायबलनुसार पापांची क्षमा

पापामुळे मनुष्य देवापासून दूर झाला. पापांची क्षमा मिळविण्यासाठी मानव अनेक प्रकारचे प्रयत्न करतो; परंतु बायबलनुसार पापांच्या क्षमेचा आधार प्रभू येशू ख्रिस्ताचा वधस्तंभावरील यज्ञ आहे.

पापांची क्षमा हे देवाचे दान आहे. मनुष्याला हे दान ख्रिस्तावरील विश्वासाद्वारे मिळते.

मानवाने देवाच्या आज्ञा मोडल्या आहेत. त्यामुळे पापांची क्षमा करण्याचा अधिकार देवाचाच आहे. आपण केलेल्या पापांबद्दल देवाकडे क्षमा मागितली पाहिजे.

१ योहान १:९ — “जर आपण आपली पापे पदरी घेतली, तर तो विश्वसनीय व न्यायी आहे म्हणून आपल्या पापांची क्षमा करील.”

देवाने प्रभू येशू ख्रिस्ताला तारणारा म्हणून उच्च पद दिले.

प्रेषितांची कृत्ये ५:३१ — देवाने येशूला अधिपती व तारणारा असे उच्च पद दिले, जेणेकरून इस्राएलाला पश्चात्ताप व पापांची क्षमा ही देणगी मिळावी.

प्रेषितांची कृत्ये १३:३८ — ख्रिस्ताद्वारे पापांच्या क्षमेची घोषणा करण्यात येत आहे.

८. पापांच्या क्षमेचा आधार

देव कनवाळू आहे. त्याच्या दयेमुळे त्याने मानवाच्या तारणाची योजना केली. देवाच्या दयेमुळेच पापांची क्षमा मिळण्याचा मार्ग उपलब्ध झाला आहे.

स्तोत्रसंहिता ७८:३८ — देव कनवाळू असल्यामुळे लोकांच्या अपराधांची क्षमा करतो आणि त्यांचा नाश करीत नाही.

पापांची क्षमा मिळविण्यासाठी देवाकडे वळणे आवश्यक आहे. देव न्यायी आणि पवित्र आहे; तरीही तो पश्चात्ताप करणाऱ्याला क्षमा करण्यास तयार आहे.

१ योहान १:९ — देव विश्वसनीय व न्यायी आहे; म्हणून आपण पापे कबूल केल्यास तो आपल्या पापांची क्षमा करतो.

ख्रिस्ताच्या बलिदानामुळे पापांच्या क्षमेचा मार्ग खुला झाला आहे.

९. देवाच्या क्षमेची पूर्णता

देवाने केलेली क्षमा पूर्ण आहे. तो पश्चात्ताप करणाऱ्याच्या पापांची क्षमा करतो.

स्तोत्रसंहिता १०३:३ — देव तुझ्या सर्व दुष्कर्मांची क्षमा करतो.

यशया १:१८ — परमेश्वर म्हणतो, “चला, या, आपण बुद्धिवाद करू. तुमची पातके लाखेसारखी लाल असली, तरी ती बर्फासारखी पांढरी होतील. ती किरमिजासारखी तांबडी असली, तरी लोकरीसारखी होतील.”

देव आपल्या पापांची क्षमा करतो आणि त्यांना आपल्यापासून दूर करतो.

स्तोत्रसंहिता १०३:१२ — पश्चिमेपासून पूर्व जितकी दूर आहे, तितके त्याने आमचे अपराध आमच्यापासून दूर केले आहेत.

यशया ३८:१७ — “तू माझी सर्व पापे आपल्या पाठीमागे टाकिली आहेत.”

मनुष्याला स्वतःची किंवा इतरांची पापे विसरणे कठीण असू शकते; परंतु देवाच्या क्षमेवर विश्वास ठेवून आपण त्याच्याकडे वळले पाहिजे.

१०. पापांची क्षमा मिळविण्याच्या अटी

१०.१ पश्चात्ताप

प्रेषितांची कृत्ये ५:३१ — पश्चात्ताप आणि पापांची क्षमा यांचा संबंध स्पष्ट केला आहे. मनुष्याने आपल्या पापांची जाणीव ठेवून देवाकडे वळले पाहिजे.

१०.२ विश्वास

लूक ७:५० — “तुझ्या विश्वासाने तुला तारले आहे.”

प्रभू येशू ख्रिस्तावर विश्वास ठेवणे हे ख्रिस्ती जीवनातील महत्त्वाचे तत्त्व आहे.

१०.३ पापांची कबुली

स्तोत्रसंहिता ३२:५ — “मी आपले पाप तुजजवळ कबूल केले, मी आपली अनीती लपवून ठेविली नाही.”

आपली पापे लपवून न ठेवता ती देवाजवळ कबूल करणे आवश्यक आहे.

१०.४ इतरांना क्षमा करणे

मत्तय ६:१५ — “परंतु जर तुम्ही लोकांना क्षमा केली नाही, तर तुमचा पिताही तुमच्या अपराधांची क्षमा करणार नाही.”

इफिसकरांस ४:३२ — जशी देवाने ख्रिस्ताच्या ठायी तुम्हांला क्षमा केली आहे, तशी तुम्हीही एकमेकांना क्षमा करा.

मत्तय १८:२१–३५ — कृतघ्न चाकराचा दृष्टांत वाचा.

११. देवाची क्षमा आणि आपल्या जीवनातील बदल

देव आपल्याला क्षमा करण्यास तयार आहे. परंतु देव क्षमा करतो म्हणून आपण पाप करीत राहावे, असा अर्थ घेणे पूर्णपणे चुकीचे आहे. असे केल्याने आपण देवाच्या दयेचा अनादर करतो.

देवाने आपल्याला क्षमा करावी अशी इच्छा असेल, तर आपण मनापासून पश्चात्ताप केला पाहिजे, आपली पापे कबूल केली पाहिजेत आणि आपल्या जीवनात बदल घडवून आणला पाहिजे. तसेच, देवाने आपल्याला क्षमा केली आहे, त्याप्रमाणे आपणही इतरांना क्षमा करण्यास तयार असले पाहिजे.

निष्कर्ष: तारणासाठी खरा पश्चात्ताप महत्त्वाचा आहे

खरा पश्चात्ताप हा तारणाच्या मार्गावरील महत्त्वाचा टप्पा आहे. पश्चात्ताप म्हणजे केवळ पापाबद्दल दुःख व्यक्त करणे नव्हे, तर पापाचा त्याग करून देवाकडे वळणे आणि त्याच्या इच्छेप्रमाणे जीवन जगणे होय.

बायबल आपल्याला पश्चात्ताप करण्यास, पापे कबूल करण्यास, प्रभू येशू ख्रिस्तावर विश्वास ठेवण्यास आणि इतरांना क्षमा करण्यास शिकवते.

जर हे बायबलमधील शिक्षण तुम्हाला आशीर्वादित करणारे वाटले असेल, तर ते आपल्या प्रियजनांनाही जरूर पाठवा. ☺💓